Чытаннi дня

Чацвер — Першы тыдзень Адвэнту

ПЕРШАЕ ЧЫТАННЕ
                                                          Іс 26, 1–6
Няхай увойдзе народ справядлівы

Чытанне кнігі прарока Ісаі.

У той дзень заспяваюць гэтую песню
ў зямлі Юдэйскай:
У нас моцны горад;
Ён даў нам муры і вал для абароны.
Адчыніце брамы!
Няхай увойдзе народ справядлівы,
які захоўвае вернасць.
Моцнага духам Ты захоўваеш у глыбокім спакоі,
бо ён спадзяецца на Цябе.
Спадзявайцеся на Пана заўсёды,
бо Пан ёсць вечная Скала!
Бо Ён прынізіў тых,
хто жыве на вышыні,
высока ўзняты горад зваліў,
зваліў яго на зямлю,
скінуў яго ў пыл.
Топчуць яго ногі, ногі прыгнечаных і ступні бедных.

Гэта слова Божае.

РЭСПАНСАРЫЙНЫ ПСАЛЬМ

                              Пс 118 (117), 1 і 8–9. 19–21. 25–27а (Р.: 26а)
Рэфрэн: Благаслаўлёны, хто ідзе ў імя Пана.
Альбо: Аллелюя.

1. Хваліце Пана, бо Ён добры, +
бо навекі міласэрнасць Ягоная. *
8. Лепш ускладаць надзею на Пана, +
чым спадзявацца на чалавека.
9. Лепш ускладаць надзею на Пана, *
чым спадзявацца на вяльможных.

Рэфрэн:

19. Адчыніце мне брамы справядлівасці, +
я ўвайду ў іх і буду праслаўляць Пана. *
20. Вось брамы Пана, +
справядлівыя ўвойдуць у іх.
21. Слаўлю Цябе, бо Ты мяне пачуў *
і стаўся маім збаўленнем.

Рэфрэн:

25. О Пане, збаў! О Пане, паспрыяй. *
26. Благаслаўлёны, хто ідзе ў імя Пана,
благаслаўляем вас з дому Пана. *
27. Пан ёсць Богам, +
і Ён асвятліў нас.

Рэфрэн:

СПЕЎ ПЕРАД ЕВАНГЕЛЛЕМ

                                                                      Іс 55, 6
Акламацыя: Аллелюя, аллелюя, аллелюя.

Шукайце Пана, пакуль Ён дазваляе сябе знайсці,
клічце Яго, пакуль Ён блізка.

Акламацыя: Аллелюя, аллелюя, аллелюя.

ЕВАНГЕЛЛЕ
                                                                                                            Мц 7, 21. 24–27
Хто выконвае волю Айца, той увойдзе ў Нябеснае Валадарства

+ Чытанне святога Евангелля паводле Мацвея.

У той час:

Езус сказаў вучням сваім: Не кожны, хто кажа Мне: Пане, Пане, — увойдзе ў Нябеснае Валадарства, але толькі той, хто выконвае волю Айца Майго, які ў нябёсах. Вось жа кожны, хто слухае гэтыя словы Мае і выконвае іх, будзе падобны да чалавека разумнага, які пабудаваў свой дом на скале. І пайшоў дождж, і разліліся рэкі, і падзьмулі вятры, і ўдарылі ў дом той; і ён не ўпаў, бо пастаўлены быў на скале. А кожны, хто слухае гэтыя словы Мае і не выконвае іх, будзе падобны да чалавека неразважлівага, які пабудаваў свой дом на пяску. І пайшоў дождж, і разліліся рэкі, і падзьмулі вятры, і ўдарылі ў дом той; і ён упаў, і было падзенне яго вялікае.

Гэта слова Пана.


3 снежня — успамін св. Францішка Ксавэрыя, святара

ПЕРШАЕ ЧЫТАННЕ
                                                                      1 Кар 9, 16–19. 22–23
Гора мне, калі я не абвяшчаю Евангелля

Чытанне Першага паслання святога апостала Паўла да Карынцянаў.

Браты:

Калі я абвяшчаю Евангелле, то мне няма чым хваліцца, бо абавязак гэты ўскладзены на мяне, і гора мне, калі я не абвяшчаю Евангелля. Бо, калі раблю гэта з уласнай волі, атрымліваю ўзнагароду; а калі супраць волі, то выконваю даручаны абавязак. Якая ж мая ўзнагарода? Каб, бескарысліва прапаведуючы Евангелле, я даносіў навіну пра Хрыста, не карыстаючыся маёю ўладаю ў Евангеллі. Таму што, будучы вольным ад усіх, я стаў нявольнікам ўсіх, каб здабыць яшчэ больш. Для нядужых я быў, як нядужы, каб здабыць нядужых. Для ўсіх я стаў усім, каб любою цаною збавіць некага. Раблю ж гэта дзеля Евангелля, каб стаць яго саўдзельнікам.

Гэта слова Божае.

РЭСПАНСАРЫЙНЫ ПСАЛЬМ

                                     Пс 117 (116), 1–2 (Р.: Мк 16, 15)
Рэфрэн: Ідзіце і абвяшчайце Евангелле.

Або: Аллелюя.

1. Хваліце Пана, усе народы, *
праслаўляйце Яго ўсе плямёны.
2. Бо вялікая над намі Яго міласэрнасць, *
і вернасць Ягоная трывае навекі.

Рэфрэн:

СПЕЎ ПЕРАД ЕВАНГЕЛЛЕМ

                                                                          Мц 28, 19а. 20b
Акламацыя: Аллелюя, аллелюя, аллелюя.

Ідзіце і навучайце ўсе народы, — кажа Пан;
Я з вамі ва ўсе дні аж да сканчэння веку.

Акламацыя: Аллелюя, аллелюя, аллелюя.

ЕВАНГЕЛЛЕ
                                                                            Мк 16, 15–20
Ідзіце па ўсім свеце і абвяшчайце Евангелле

+ Чытанне cвятога Евангелля паводле Марка.

У той час:

Езус з’явіўся Адзінаццаці і сказаў ім: Ідзіце па ўсім свеце і абвяшчайце Евангелле ўсякаму стварэнню. Хто паверыць і ахрысціцца, будзе збаўлены, а хто не паверыць, будзе асуджаны. Тым, хто паверыць, будуць спадарожнічаць такія знакі: у Маё імя будуць выганяць злых духаў; будуць размаўляць новымі мовамі; змеяў рукамі браць будуць, і, калі штосьці атрутнае вып’юць, не зашкодзіць ім. На хворых будуць ускладаць рукі і яны выздаравеюць.

І Пан Езус, пасля размовы з імі, узнёсся ў неба і сеў праваруч Бога. А яны пайшлі і паўсюль абвяшчалі Евангелле. Пан садзейнічаў ім і пацвярджаў слова знакамі, што яму спадарожнічалі.

Гэта слова Пана.

 

Пераклад здзейснены Секцыяй па перакладзе літургічных тэкстаў і афіцыйных дакументаў Касцёла пры ККББ.
Тэксты лекцыянарыя ўзяты з сайта catholic.by
Чытаннi дня